Plantun de Prouvènço

Pèr coumpara dos planto d'encò nostre

Asplenium trichomanes subsp. inexpectans & Fissidens dubius

Erbo-de-l'escaleto

Asplenium trichomanes subsp. inexpectans

Aspleniaceae

Àutri noum : Erbo-de-la-bresego, Poulitri.

Noms en français : Capillaire des murailles, Doradille polytric.

Descripcioun :
Aquesto erbo-de-l'escaleto de la subsp. inexpectans se destrìo de la subsp. coumuno, trichomanes, que lou bout di foundo s'acabo d'un cop sus un tros bèn mai gros (fotò). Peréu, li foundo soun forço procho de la roco coume se s'i'arapavon.

Usanço :
Dèu agué li mémi prouprieta que l'erbo-de-l'escaleto coumuno, Asplenium trichomanes subsp. trichomanes. Pamens vau miés pas l'acampa qu'es uno planto raro (e bèn mai pichoto).

Port : Pichoto planto lignouso
Taio : 4 à 10 cm
Fueio : Foundo
Tipe bioulougico : Emicriptoufite
Cicle bioulougico : Planto renadivo

Gènre : Asplenium
Famiho : Aspleniaceae

Ordre : Polypodiales

Coulour de la flour : Ges de flour
Petalo : ges
Ø (o loungour) flour : Ges de flour
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Paret - Roucas
Estànci : Coulinen à Mountagnard
Couroulougi : Cousmoupoulito
Ref. sc. : Asplenium trichomanes subsp. inexpectans Lovis, 1964

Mousso-divisado-doutouso

Fissidens dubius

Fissidentaceae

Nom en français : Fissident crête-de-coq.

Descripcioun :
Aquelo mousso dóu gènre Fissidens (peristome divisa, vèire li fotò) trachis sus li roco cauquiero e de cop que i'a au sòu. Es uno mousso pulèu pichoto auto de 1 à 3 cm. Fai partido dóu group qu'a ges de lòngui celulo sus lou bord de la fueio (fotò), pamens se vèi bèn uno bando de 3 à 4 cellulo pu claro. Se recounèis tambèn à sa pouncho de fueio emé un benc e que la costo s'acabo just avans lou bout (fotò). Es couneigudo pèr pas faire trop d'espouroufite, pamens sèmblo pas trop lou cas au nostre.

Usanço :
Se pòu counfoundre emé d'àutri meno dóu meme gènre subretout Fissidens taxifolius qu'a pas lou bout de fueio denta d'un biais irregulié e peréu que la costo vai fin qu'au bout dóu bènc (de vèire au microuscope).